मी कधी स्पर्श केला नाही झाडाला.
कधी पाणी नाही घातलं बुडाशी.
कधी बघितलं नाही बारकाईने
की कसं एका बीमधून उगवून आलं रोप
आणि मुळावत गेलं घट्ट मातीत
आणि झेपावत गेलं आकाशात.
कधी कौतुक केलं नाही हिरव्या रंगाचं.
फॉरेस्ट ग्रीन उठून दिसेल भिंतीला,
बायको म्हणाली. तसं केलं.
आरामखुर्चीत बसून भर दुपारी
उन्हाची कल्पना करत भिंतीच्या सावलीत
गार बसलो.
दाह कमी नाही झाला.
तहानेने घसा कोरडा झाला.
आरोचं पाणी प्यायलो.
मी कधी पाण्याला स्पर्श नाही केला.
खिडकी असण्याची जवळपास
शक्यता असणार्‍या या चौकटीतून
मी पाहतोय बाहेरच्या शक्यतेत
बाहेरच्या शक्यतेत मी पाहतोय
आकाश असण्याची जवळपास
शक्यता असणार्‍या आकाशाच्या दिशेने
मला जो दिसतोय
कदाचित निळा रंग
ढग असण्याची शक्यता असणार्‍या
पांढया पुंजक्यांच्या मागे
तोच आहे का आकाशाचा रंग
मला जे दिसतेय
कदाचित घुमटासारखे गोल छत
क्षितीज असण्याच्या दाट शक्यतेपर्यंत
खोलवर उतरलेलं
तसाच्च्या तस्सा आहे का आकार आकाशाचा
हे जे चार आकडयांचे कदाचित पक्षी
उंडारताहेत पंख पसरून
तीच आहे का आकाशाची अथांगता
चांदणे असण्याची दाट शक्यता
असलेले हे अगणित शब्द कुजबुजताहेत
तोच आहे का नेमका
माझ्या आकाशाचा अर्थ
समोरच्या खिडकीतून पाहणार्‍याला
मी विचारला आकाशाचा अर्थ
तर तो म्हणाला
खिडकी असण्याची शक्यता असणार्‍या
चौकटीएवढं निव्वळ धुकं
टक्क उघडे डोळे
स्वर्गगामी
तुला अडकवून ठेवलं आम्ही
ब्लॅकग्रॅनाईट भिंतीवर
बापाची उजवी बाजू
तेव्हापासून रिकामीच आहे
इतकं शांत तर तुला कधीच वाटलं नसेल
इतकं शांत की
तुझ्या उजव्या खांद्यावर बसून
एखादी चिमुकली चिमणी
तुझ्या सर्वज्ञ कानात कुजबूजू शकते
मी पाहू शकतो तुझ्या चेहऱ्यावर आनंद
की तू आहेस
आणि तुझ्या अवतीभोवती चिमण्या
चिमण्या करत नाहीत भांडवल
तुझ्या हातात ठोकलेल्या खिळ्यांचं
तुझ्या रक्तामांसाशी त्यांना
करायचा नसतो कोणताच देवघेवीचा करार
तु देवाचा पुत्रयस
की माणसाचा की कुमारिकेचा की विवाहीतेचा
या गोष्टींचा चिखल चिवडत नसतात चिमण्या
चिमण्या मूकाटपणे मेटिंगरत होतात
तुझ्या डोक्यावरील ध्यानस्थ मुकूटावर
तुझ्याशी असलंच तर चिमण्यांचं
इतकंच जैविक नातं असतं
चिमण्या चिवचिवतात
त्याची प्रार्थना होते
तुझ्या लाकडी पापण्या ओलावतात
तुझे लाकडी ओठ कुजबुजतात
प्रभो, दया कर
आणि हा प्याला माझ्यापासून कधीच हिरावून घेऊ नकोस.
१
दुपारला बांधलेली आहे
घट्ट घंटी
जी टणटणटण करत
जागवतेय घशाखालची तहान
सकाळपासून खिशात
गरम झालेल्या रूपयाच्या बदल्यात
थंड होतोय घसा
कुल्फीवाल्याबरोबर घासाघीस करत
मी आठाण्यापर्यंत वितळवतो कुल्फीची किंमत
कुल्फीवाला तरीही
हसतो मिशीत मलूल
आणि टणटणटण निघून जातो
माझ्या घशात
बर्फ गोठून येतो
२
मेंदूतली घंटा वाजते
बायको म्हणते
आज मुलीला घेऊन जाऊ नॅचरल्समध्ये
विकेंडचा शेवट व्हावा गोड म्हणून
नॅचरल्सच्या काऊंटरवर
रात्री नऊ वाजता
आइस्क्रिममध्ये गोठलेला निसर्ग
आम्हाला साक्षात सामोरा येतो.
मुलगी तिला हवा असलेला
निसर्ग निवडते कपभर
हुबेहूब निसर्गाचा फ्लेवर
बायको म्हणते
मी मेंदूतली घंटा टणटणटण वाजवत
घशातली तहान जागवतोय आटोकाट
३
आता दिवस आहे
की रात्र
आता ऊन कोसळतंय
की बर्फ
आता घाम ओघळतोय
की कुडकुड वाजतेय हाडात
की टणटणटण घंटा
दुपारला बांधलेली
जी वितळवायची
माझ्या घशातली तहान
माझ्या मेंदूतला वितळत चाल्लाय
कुल्फीवाला
जरा एसी कम कर लेना भाई
बहोत ठंड लग रही है