पुस्तकदिनानिमित्त पुस्तकाशी संवाद
तुझ्यासोबत जगलेला एखादा क्षण
साजरा करावासं कधी वाटलं नाही मला
तुझ्याशी जोडलेली एकही गोष्ट
मला आठवत नाही आज
कि फेसबुकवर डकवता येईल श्टोरी
आठवत नाही कधी घेतलं
मी तुला पहिल्यांदा हातात आणि चाळलं
नाकात साठवून घ्यावासा वाटला नाही
तुझ्या पानांचा वास मला कधी
की तो आज श्वासभरून आठवेल
रोमांचित होण्यासाठी मी
कधीही केला नाही तुला स्पर्श
बेसुमार भुकेच्या काळात
तुला ओरबाडलं, भूक शमली नाही
उलट त्वचेसारखी चिकटली अस्तित्वाला
फसलेल्या संभोगासारखं आपलं नातं
अपराधी डोळ्यांनी
नजर चुकवत राहिलं आजतागायत