गुण्यागोविंदाच्या शोधात

माझ्या मेंदूत होता एक देश
होता एक ईश्वर
एक धर्म
होता हजारो वर्षे
मुळावलेला घट्ट

ईश्वर या शब्दाला
होतं चिकटलेलं एक चित्र
ज्यात आकाश होतं
आकाशावर महाभारतातले धुरांचे लोट
एक गाब्रीयल
द लास्ट सपर मधले दाढीवाले
आणि मध्ये एक मोठा माझा आजोबा
सफेद दाढीवाला
ज्याच्या डाव्या छातीत होतं
तांबडं काळींज

धर्माच्या जागी होता
संडेस्कूलचा निरागस गोंगाट
‘आपले इवलेसे हात
पोचतील तरी का’ इतक्या उंचीवर
वाजणारी चर्चबेल
डेंजर डॉन फादर डॉमणीक
नन्सच्या गळ्यातला
नन्सच्या मेंदूपेक्षा वजनी क्रॉस
आणि रोज संध्याकाळची कंटाळवाणी रोजरी
जिच्यात माझ्या डोक्यातला ठाकूर
गब्बरसींगला धुधुधुवायचा

देशाचा नकाशा
बगळ्यासारखा उभा होता
एका पायावर कायम
पंधरा ऑगस्टला शाळेबाहेर
फडफडणारा तिरंगा
एक साथ सलामी देंगे
सलामीनंतर मिळणारा खाजा
रोज शाळा सुटतानाचे
जनगनमनचे सूर
नंतर त्यात
ए मेरे वतन के लोगोने
डोळ्यांतून जबरदस्ती काढलेलं
पाणी अॅड झालं देशाच्या जागी

माझ्या मेंदूत होता एक देश
एक ईश्वर
एक धर्म
आणि काल्पनिक होता गुण्यागोवींदा
निरागस त्यांच्यासोबत नांदत
नंतर त्यात
देवंदेशंअनंधर्मासाठीप्राणंघेतलंहाती
वाजायला लागलं
आणि मी गुण्यागोविंदाच्या शोधात
बाहेर पडलो